Эзләнү отряды экспедицияне дәвам итә

«Гвардия» эзләү отрядында катнашучылар экспедиция вакытында гуманитар йөк озату буенча СВО зонасыннан командировкадан кайтып килүче Зәй районы башлыгы урынбасары Петр Уразайкин һәм «Җылы Зәй» хәйрия фонды вәкилләре Марат Кыямов һәм Дмитрий Соловьев белән очрашты. Делегация эш уздыруның куркынычсызлыгына инанды, палата лагеренда яшәү шартлары һәм инструктажлар буенча документлар алып баруның дөреслеге белән танышты. Петр Уразайкин эзләүчеләргә район башлыгы Разиф Кәримовның рәхмәт сүзләрен җиткерде һәм булачак эзләү экспедицияләрен тәэмин итүдә ярдәм итәргә ышандырды. Шулай ук СВОда катнашучы зәйлеләрдән сәлам хәрби паек җыелмаларын тапшырды.