Зәй территориаль иҗтимагый үзидарәләре «Татарстан Республикасының иң яхшы территориаль иҗтимагый үзидарәсе» республика конкурсында җиңүчеләр арасында

13 апрельдә Казанда Татарстанның иң яхшы территориаль иҗтимагый үзидарәләре вәкилләрен хөрмәтләделәр. Казан Ратушасында «Татарстан Республикасының 2017 елның иң яхшы территориаль иҗтимагый үзидарәсе» республика конкурсына йомгак ясалды һәм җиңүчеләр бүләкләнде. «Татарстан Республикасы Муниципаль берәмлекләре Советы» Ассоциациясе рәисе Әгъзам Самат улы Гобәйдуллин сүзләренә караганда, конкурста катнашучыларга тигез конкурент шартлар тудыру өчен, алар өч төркемгә бүленгән. Беренчесенә Казан һәм Яр Чаллы шәһәр округлары кертелгән, икенчесенә – 60 меңнән артык халкы булган шәһәрләр, өченчесенә-калган шәһәрләр, шәһәр тибындагы бистәләр һәм авыл җирлекләре. Грантлар устав эшчәнлеген гамәлгә ашыруга һәм социаль әһәмиятле мәсьәләләрне хәл итүгә, ТИҮ рәисен һәм активларын бүләкләүгә юнәлдереләчәк. Зәй шәһәренең 2 иң яхшы территориаль иҗтимагый үзидарәсе «Татарстан Республикасының 2017 елда иң яхшы территориаль иҗтимагый үзидарәсе " исеменә лаек булды һәм 2 урын алган "Мирный" территориаль иҗтимагый үзидарәсе рәисе М.С. Гарапшина 500 мең сумлык, 3 урын алган «Яңа шәһәр» территориаль иҗтимагый үзидарәсе рәисе Т.В. Тыткина 430 мең сумлык грантка ия булды. Безнең җиңүчеләр грантлар конкурсында ике елдан да иртәрәк катнаша алмый. «Республика җитәкчелегенең безнең эшкә зур игътибар белән каравы һәм безне җирле үзидарә органнары эшендә мөһим звено дип санавына бик шатбыз, ел саен диярлек үзебезнең микрорайон һәм шәһәребезгә файда китерә алуыбызга сөенәбез», - дип билгеләп үтте безнең җиңүчеләр. "Быел мин Завод урамының 7 -12 йортлары ишегалдына зур уен комплексы, шулай ук Мирный бистәсе паркына, Шоссе, Медицина, Автодорожная урамнарына таган һәм карусельләрдән торган балалар почмаклары урнаштырырга телим», - диде «Мирный» территориаль иҗтимагый үзидарәсе рәисе Мария Гарапшина. "Яңа шәһәр" ТИҮ активы 1/06 йорты ишегалдында балалар уен комплексын урнаштырырга карар итте", - ди рәис Тамара Тыткина. Инде берничә ел Зәй шәһәренең территориаль үзидарәләре эшен алып баручы Елена Владимировна Недошивина сүзләренә караганда, ТИҮ эше хакимият органнары белән хезмәттәшлек рәвешләренең күптөрлелеге һәм тормыш эшчәнлегенең социаль әһәмиятле өлкәләрен киң колачлау белән характерлана. "Безнең рәисләребез актив, халык проблемаларына карата битараф түгел, үз территорияләрен үстерүгә көчләрен дә вакытларын да кызганмыйлар, аларны чисталыкта, уңайлыкта һәм иминлектә тотарга әзер», - дип билгеләп үтте ул. Территориаль иҗтимагый үзидарәләр урыннарда киң социаль эшчәнлек алып баралар, торак-коммуналь хуҗалык өлкәсендә төзекләндерү эшләре алып баралар, хокук бозуларны кисәтү белән шөгыльләнәләр, массакүләм мәдәни һәм физкультура-сәламәтләндерү чаралары оештыралар.